لندن في زمن الوكليرا

لندن في زمن الوكليرا

- لما اجتاح وباء " الكوليرا " مدينة لندن منتصف القرن التاسع عشر واتسبب فى موت عشرات الآلاف من سكان المدينة، فيه شائعة انتشرت ساعتها أن الوباء بينتشر عبر هواء ردىء اصطُلح على تسميته Miasma. لكن، فيه طبيب بريطاني اسمه جون سنو John Snow اشتبه في أن المرض الغامض ده، اللى قتل ضحاياه في غضون أيام من الأعراض الأولى، يكمن في مياه الشرب في لندن.
-عمل ايه الراجل العظيم ده ؟ أرسى سنو لأسس البحث العلمى المساحى لأول مرة فى مواجهة الأوبئة. فبدل ما يسيب السلطات تولع فى المصابين أو تعزلهم عشان ما يعدوش غيرهم، عمل تحليل علمى لسجلات المستشفيات وتقارير المشرحة عشان يقدر يتتبع المواقع الدقيقة لتفشي المرض القاتل ! نتيجة أبحاثه، قام بإنشاء رسم بياني جغرافي لوفيات الكوليرا على مدى 10 أيام فلقى أن مجموعة من 500 واحد عندهم إصابة قاتلة ساكنين فى منطقة محيطة بمضخة برود ستريت، وهي مضخة شهيرة لمياه الشرب فى لندن.
- بجهود حثيثة، قدر سنو أنه يقنع المسؤولين المحليين بإزالة مقبض المضخة في شارع برود ستريت، وخلاها غير قابلة للاستخدام، وزى السحر جفت العدوى بشكل جذرى، رغم أن سنو ما اخترعش لا مصل ولا كان عنده فريق علمى جبار ولا إمكانيات مادية عشان يعمل ده، لكن بحثه أدى في النهاية إلى جهد عالمي لتحسين الصرف الصحي في المناطق الحضرية وحماية مياه الشرب من التلوث، وتطوير الدراسات المساحية للأمراض والأوبئة المهمة جداً.

- الحقيقة القصة دى تدعو للتأمل فى كذا حاجة :

1- اللى كان مخلى الوباء يستفحل فى لندن هو أن الناس كانت مصدقة إشاعات وماشية بيها من غير تحقق بل بالعكس بينشروها كحقيقة.
2- سنو ما عندوش الإمكانيات العلمية الجبارة، بس أى واحد باحث فى أى مجال ومبدع وعنده شغل حقيقى ممكن ينور لمبة تسبب فى حصر الوباء والمرض، زيها بالظبط زى اختراع المصل، البحث العلمى هو الحل فى المجال اللى أقدر أدى فيه.
3- الوقاية ثم الوقاية ثم الوقاية، سنو ماعلجش حد بس منع سبب انتشار الوباء، ولما وصل لسبب صحيح ماقلش أنا مش قادر أعمل العلاج وحتى الحكومة لو حاولت الموضوع هياخد وقت كبير، لأ ده اتصرف فوراً ناحية الوقاية اللى قللت الأعداد بشكل جذرى.

- رسالة للجميع : اتأكد من المعلومة قبل نشرها :) شجع أى جهد إيجابى علمى حقيقى فى أى مجال ممكن يفيدنا نعدى الأزمة .. مش شرط اختراع المصل بس :) .. أخيراً، خليك فى البيت عشان الوقاية أهم شىء :) ربنا يحافظ على الجميع .

يوسف صابر ..